Sobre Aquí e Agora

Tes curiosidade por saber quen somos? Somos a radio da xente wapa 🙂

Quen somos?

Somos a xente da Asociación Cultural Vox Populi da Coruña. 

Levamos dende 1976 facendo cousas pola cultura e a língua do noso país, traballando por acadarmos unha Galiza plena. 

Facemos un lote de cousas do máis variadas, xa ves, agora deunos por iniciar esta aventura radiofónica, pero moi importante, queremos contar contigo!

Que somos?

Somos un proxecto de radio galega e en galego non profesional, que nace do activismo cultural militante de base para navegar polos novos formatos de difusión dixital. 

Un programiña alegre e combativo que aspira acadar semanalmente a túa complicidade para pasarmos xunt@s un tempo feliz. Aspiramos a medrar contigo, a crecer en contidos, seccións e colaboracións. 

Canta máis xente sexamos, mellor o imos pasar!

Aqui e agora estudo

Que non somos?

Non somos un medio de comunicación como tal. Non facemos xornalismo, nin é a nosa intención. 

Na Galiza dispoñemos dun amplo, plural e diverso panorama mediático que respira democracia e transparencia por todos os poros da súa pel. 

A maiores temos a sorte e o orgullo de contar coa TVG e a Radio Galega, medios públicos obxetivos e veraces, alonxados de calquera traza de manipulación informativa. 

Ademais, a radiotele dos fachas pon en valor e prestixia socialmente ao noso idioma e á nosa cultura, especialmente entre as xeracións máis novas.

Onde estamos?

Habitamos na galaxia de Pucho Boedo e David Bowie, compartimos vecindario con Simone de Beauvoir e Manuel Antonio. 

No mundo terrenal andamos pola rúa dos olmos 16-18, sede da Agrupación Alexandre Bóveda da Coruña, aínda que che vai resultar máis doado dar con nós nalgún dos bares e tascas da zona. 

Sempre na mesa do fondo!

Non perdas ningún programa. Non tes excusa!

… ou síguenos en Ivoox.

Coa colaboración de:

A Asociación Cultural Vox Populi obtivo, entre outras, unha subvención da Deputación da Coruña dentro do programa para a realización de investimentos culturais en 2020 que axudou á adquisición dun Equipo de Audio Behringer PA 550X4, unha Mesa de Audio Behringer Xenyx X2442USB, un Proxector Benq 3000 lumens MX660p, un Dron DJV mavic pro e un DJI Osmo Pocket cos cales realizamos parte do nosos traballos, creacións e cursos formativos nos ámbitos da informática, a creación audiovisual e o ámbito radiofónico.